Udal pilotalekua partidaz beteko da asteburuan, eta gaur bertan izango dira lehenak. 19:00etan hasiko dira, errendimenduko mendebaldeko faseko Gipuzkoako Binakako Txapelketarekin. Gabilondok eta Leturiak osatutako Bergara 3 taldea Aloña Mendi 3 taldearen aurka lehiatuko da, eta jarraian, Fernandez eta Ninen Bergara 2 taldeak Zumaia 2 izango du aurkari. Udaberriko Binakako Txapelketako partidak emango dio amaiera egunari. Zamakolak eta Loyolak osatutako bikoteak Lezoko Arkirun taldea izango du aurrean. Bihar, berriz, benjamin mailako Eskolarteko Txapelketako partidak jokatuko dira.
Astean ere izango da pilotaz gozatzeko aukera. XVI. Soraluce lau eta erdiko txapelketaren bosgarren jardunaldia izango da ikusgai martxoaren 3an, 19:30ean hasita. Promesetan, Haritz Etxabe bergararrak Pablo Aldaz izango du aurrean; eta nagusietan, Gaizka Carregal eta Oihan Etxeberria lehiatuko dira.