Aranzadi, Mariaren Lagundia eta San Martin ikastetxeetako LH4 eta LH5 mailako ikasleak dira kontseilukideak. Udaletik adierazi zutenez, parte hartzeko aukera ikasle guztiei zabaldu zitzaien, eta izena eman zutenen artean zozketa bidez hautatu dira kideak. Otsailaren 11n egin zuten lehendabiziko bilera, eta elkar ezagutzeko eta haurrek zein gairi erreparatzen dioten ezagutzeko baliatu zuten. Aurreratu dutenez, bilerak hilean behin egingo dituzte.
"Haurrak entzutea ez da soilik hezkuntza-prozesuaren ondorio: eskubide bat da, eta, aldi berean, haurrak iritzia izaten eta hori modu naturalean partekatzen ohitzeko tresna. Gainera, parte hartzeak haurren erantzunkidetasuna, gizartearekiko lotura eta ikuspegi propioa garatzeko gaitasuna ere lantzen ditu. Bestalde, haurren ikuspegiak sarri guraso edo helduok kontuan hartzen ez ditugun errealitateak azaleratzen ditu", azaldu dute egitasmoaren sustatzaileek.