32 film labur aurkeztu dira aurten XXIII. edizioa izango duen Laburbira ekimenera, eta horietako zazpi aukeratu dituzte datozen asteotan herriz herri erakusteko. "Orotara, 80 minutuko film-labur sorta osatu da, ikusleei ahalik eta emanaldi aberasgarriena eskaini asmoz. Denetariko lanak aurkitu daitezke bertan, eduki zein estiloz, horietako asko jada zenbait zine jaialditan saritutakoak", azaldu dute ekimenaren bultzatzailea den Taupa euskaltzaleen mugimendutik.
Herriz herriko ibilbide hori hasi aurretik, baina, Bergaran egingo dute aurrestreinaldia ostegun honetan, otsailaren 26an. 18:30 hasiko da emanaldia, Seminarixoan. Bertan, film laburretako zuzendariekin batera, Laburbiraren XXIII. edizioko xehetasunak ere aurkeztuko dituzte.
Hauke dira aurtengo Laburbiran erakutsiko diren pelikulak:
- Olentzerori eskatu nion (Amaia San Sebastian Larzabal)
- Erreka zoko hortan (Ekaitz Bertiz)
- Fischy (June Asua Olabarria)
- A-Maniki (Elixabet Nuñez)
- Geratzen den hori (Aitor Gametxo Zabala)
- Orain zer? (Aihnoa Urgoitia)
- Hortzikara (Ane Cuesta)
Herrietako emanaldiak
Zinemagileei beraien lanak erakusteko aukera emanaz euskal zinemagintza hauspotzea eta herritarrei euskaraz sortutako film laburrak ezagutaraztea. Horiek dira Taupa euskaltzaleen mugimenduak Laburbirarekin lortu gura ditun bi helburuak eta bertatik gogorarazi dutenez, edozein herritan egin daitezke emanaldiak. Hala, emanaldi bat antolatu gura dutenek otsailaren amaierara arte egin ahalko dute horretarako eskaria webgune honetan. Martxoaren 1etik 29ra bitartean izan beharko dira emanaldiak . Horretaz gain, sortzaile eta ikusleen arteko harremana erraztu eta sendotu asmoz, zuzendariekin solasaldiak antolatzeko aukera ere badago proiekzioaren barruan.