Plaza berrurbanizatzeko lanen artean, zoladurak eta estaldurak berrituko dituzte; lur mugimenduak eta saneamendu sarea egokitu; argiteria publikoa berrantolatu eta energia sareak eguneratu; telekomunikazioen, gasen eta ur horniduren sare berriak ezarri; lorategi eta altzarigintza elementu berriak instalatu, eta obren fasekatzea egin oinezkoen joan etorriak eta merkatarien sarbidea ahalik eta gehien bermatzeko. Proiektua Vaumm Arkitektura enpresak idatzitakoa da.
Markel Azkargorta Hirigintza zinegotziaren iritziz, alde zaharra biziberritzeko estrategiaren barruan kokatzen dira San Martin Agirre plaza berrurbanizatzeko lanak: "Bergarako erdigune historikoko espazio nagusietako bat egokituko dugu, bergararron eguneroko erabilerarako atseginagoa eta irisgarriagoa izan dadin. Era berean, lanak fasekatuta egingo dira, ahalik eta eragin txikiena sortzeko, eta ondare arkeologikoa bermatzeko mekanismo guztiak aktibatuko dira".
Udalak jakinarazi du, kontratua sinatu ondoren, adjudikazio hartzaileak obra hasteko dokumentazioa, segurtasun eta osasun plana eta lanen antolaketa aurkeztuko dituela.