2026an emango duten lehendabiziko kontzertua izango da, eta giga musika izango da protagonista. "Antzinako musikari eskainitako kontzertua izango da. Gure kalejiren eta biribilketen aitzindaria da. Hamar obra joko ditugu", azaldu du taldeko zuzendari Jose Miguel Laskurainek.
Urteak daramatzate udaletxean kontzertuak ematen, eta, Laskurainen esanetan, balioa eman nahi diote txistuari kontzertu horien bitartez: "Entzule fidelak ditugu, aretoa beti betetzen dutenak, eta pozik gaude haien laguntzarekin".
Esan duenez, saiatzen dira kontzertuetan interpretatuko duten musikari buruzko xehetasunak ematen. "Horrela, guk hobeto ulertzen dugu zer interpretatzen dugun eta jendeak azalpenekin gozatzen du. Hori ez da ohikoa izaten", dio.
Hamar kide, hamar emanaldi
Gaur egun, hamar kide dira Txistulari Bandan, eta horietatik erdiak, Musika Eskolan haziak. Urtean hamar bat kontzertu ematen dituzte, eta hogei bat kalejira egiten dituzte herriko auzoetan nahiz festetan.