Bergarako Seminarixoa eta inguruak ongizatearen inguruko gogoeta eta parte-hartzerako plaza bihurtu dira eguenetik egubakoitzera bitartean, Gipuzkoako Foru Aldundiak eta Bergarako Udalak antolatutako Ongizatearen Plazaren eskutik. Bi egunez, osasun fisikoa, mentala, elikadura jasangarria, zahartzaro aktiboa, inklusioa eta teknologiaren erabilera arduratsua jorratuko dituzte, adituen, eragileen eta herritarren arteko topagune irekia eskainiz.
Osasunaz harago, ongizatearen ikuspegi integrala lantzeko espazioa da, kontzeptua ulertzeko eta komunitate gisa erronka berriei aurre egiteko tresnak partekatzeko helburuarekin. Egitasmoaren irekieran, Gipuzkoako diputatu nagusi Eider Mendoza Larrañagak eta Bergarako alkate Gorka Artolak azpimarratu zuten plazen izaera komunitarioa berreskuratu nahi izan dutela, elkar entzun, elkarrekin egon eta esperientziak partekatzeko espazio gisa.
Gaur goizean egitaraua Adinberri telebista saioarekin abiatu zen; Iñigo Vicens prestatzaile fisikoak gerturatu diren guztiak mugiarazi ditu, eta, jarraian, Raquel Rodriguezek mindfulness saioa egin du. Ostean, elikadura izan da protagonista, Jakoba Errekondoren solasaldi eta tailerraren bidez. Mikel Igartua eta Maialen Madina bertako nekazariek ere egin dituzte euren ekarpenak.
Eguerdiko etenaldiaren ondoren, 17:00etan teknologiarekiko harreman osasuntsua landuko dute Altxa Burua topaketan, batez ere gazteen eta familien egunerokoan duen eraginari erreparatuz. Jardunaldia amaitzeko, 18:00etan Osasun mentala mintzagai hitzaldia eskainiko du Gurutz Linazasoro neurologoak, Aizpea Goenagarekin moderatzaile lanetan, osasun mentalaren inguruko erronkak eta prebentzioaren garrantzia hizpide hartuta.
Egubakoitzeko egitaraua
- 10:00-12:00 Adinberriren eskutik: Debagoiena Ehuntzen, bakardadeari aurre egiteko ekimenaren aurkezpena.
- 12:00-13:00 Podcasta zuzenean: Why Not Fundazioarekin, osasun mentala eta adinekoen zaintza hizpide.
- 17:00-19:00 Zine zikloa: How to Have Sex, aurkezpena Joxean Fernandezen eskutik eta solasaldia Bergarako Zine Forumarekin.
- 19:30-20:00 Musika saioa eta Pitxo-Potea