Hiru ikasturteko ikerketarako, EAEko hiru ikastetxe aukeratu dituzte, eta horien artean dago, hain zuzen, Angiozarko Eskola Txikia. Mondragon Unibertsitateak estatuko beste hainbat unibertsitaterekin batera egingo duen ikerketa honetako ikerlariak Nagore Iñurrategi eta Irati Sagardia dira; haiek izango dute ikasle zehatz batzuen LHtik DBHrako jauzia neurtzeko ardura.
Mondragon Unibertsitateko doktoreak dira Iñurrategi eta Sagardia eta hezkuntza berritzailearen eremuan dihardute ikertzen, Humanitate eta Hezkuntza Zientzien Fakultatean.
Hitzaldia ostegunean
Ikerketarekin lotuta, guraso eta hezitzaileei zuzendutako hitzaldia antolatu du Arbiaska Guraso Elkarteak. Iñurrategi eta Sagardia ikertzaileek jardungo dute bertan eskola berritzailearen inguruan hizketan, Bergarako Irizar jauregiko 3. solariuko aretoan, ostegunean –urtarrilak 15–, 18:00etatik 19:30era. Hitzaldian, adin-artekotasuna, ratio txikiak, asanblada, proiektuka oinarritutako irakaskuntza, baso-eskola eta komunitatearen inguruko gaiak jorratuko dira.
Bestetik, urtarrilaren 17an, larunbata, Angiozarko eskola bisitatzeko aukera egongo da.