Aurten, Bergarako Orfeoia Soraluzeko Ezoziko Ama Abesbatzarekin elkartu da Gabon ispilua kontzertua emateko; bi emanaldi egingo dituzte, guztira, 60 kantarik. Publikoari bidaia musikal berezia proposatuko diote, Aitor Biain-Bidarteren gidaritzapean eta Eli Mendiaraz piano joleak lagunduta. Lehen kontzertua Bergarako Seminarixoan egingo da, egubakoitzean, arratsaldeko zortzietan. Bigarrena, berriz, zapatuan Soraluzeko Benetazko Andra Mari Parrokian izango da, arratsaldeko zazpietan. Bi kontzertuak doan izango dira.
Gabon kantuen elkarrizketa
Euskal Herriko Gabon kantuak eta munduko beste herrialde batzuetako melodiak elkarrizketan jarri dituzte, eta konparaketa poetiko eta kulturala sortu dute. Tradizio askoren arteko antzekotasunak, desberdintasunak eta elkarrekin sortzen duten aberastasuna entzuleei modu argi eta emozionalean erakutsiko dizkiete bi abesbatzek. Ikuskizunak polifonia klasikoa, erromantizismo alemaniarra, haur-kantuen moldaketa garaikideak, tradizio hispanikoak eta gospelaren indarra batzen ditu, kontzertu bakarrean, tradizioak elkarlotuz.
45. Gabonetako kontzertua
Abenduaren 20an arratsaldeko zortzi eta erdietan Udal Pilotalekuan egingo den 45. Gabonetako kontzerturako sarrerak salgai daude, zortzi eurotan, www. seminarixoa.com-en. Egunean bertan ere aukera egongo da erosteko, Pilotalekuan bertan. Bergarako Orfeoiak, Aritzeta abesbatzak, Bergarako Musika Bandak eta Bergarako Orkesta Sinfonikoak batera eskainiko dute gabonetako kontzertua.