EAEko Legebiltzarrak Herri Ekimen Legegilea (HEL) tramitatzeari "betoa jarri izana" salatuko du Euskal Herriko Pentsiodunen Mugimenduak, Gasteizeko Bilbao Plazan, abenduaren 18an, eguena, 11:00etan. Pentsiodunen Mugimenduaren esanetan, "iseka" egin diete parlamentuan "145.142 sinatzaileri, sindikatu guztiei, ehun bat erakunde sozial eta feministari, eta beren gizarte-eremuan erreferenteak diren 289 pertsonari". Horregatik, Herri Ekimen Legegilearen inguruko erabakia "zuzentzea" eta datorren urteko aurrekontuetan "partida bat gaitzea" exijituko dute.
Datorren egueneko mobilizaziora joateko bi autobus antolatu dira Debagoienan. Bata, Antzuolatik 09:15ean eta Bergaratik 09:20an irtengo da –Elgetakoek Bergaran hartu dezakete autobusa–. Bestea, Oñatitik 09:15ean, Arrasatetik 09:30ean eta Aretxabaletatik 09:35ean irtengo da.
Mobilizazioa bihar, Bergaran
Gasteizeko manifestazioarekin batera, Bergaran ere antolatu dute mobilizazioa, bihar, zapatua. San Martin plazan dago deituta manifestazioaren hasiera, 12:00etan. Astelehenean, –abenduak 15– urteko azken elkarretaratzea ere egingo dute.