Urriaren 18an jarri zen martxan Argitzen deliberazio prozesuaren erdigunean dagoen Herritarren Batzarra; eskualdeko 50 kidez osatua dago. Bost saiotan zehar, energia trantsizioaren inguruko informazioa jaso dute, hainbat adituren eskutik, ondorengo galderari erantzun ahal izateko: Zein ekintza edo aldaketa burutu beharko dituzte Debagoieneko tokiko eragileek energia kontsumoa murrizteko eta energia berriztagarrien garapenerako?
Galderari erantzunez, gomendio-sorta bat adostu dute. Bertan, besteak beste, instalazio fotovoltaikoen kudeaketaren prozesu guztian zerbitzu integrala eskaintzea eta herritarren iritzi eta ekarpenak erdigunean dituen prozesuen bidez energia berriztagarrien azpiegiturak aztertzea proposatu dute. Baita Debagoieneko autoaren mugikortasun alternatiborako sarea sortzea eta Debagoieneko ibilgailu publikoen elektrifikazioa lortzea ere.
Gomendio-sorta
11 gomendio biltzen ditu dokumentuak:
- Instalazio fotovoltaikoen kudeaketaren prozesu guztian zerbitzu integrala eskaintzea.
- Instalazio fotovoltaikoen sustapena.
- Energia berriztagarrien azpiegiturak aztertzea, herritarren iritzi eta ekarpenak erdigunean dituen prozesuen bidez.
- Eraikin publiko zein pribatuen transformazioa, efizientzia energetiko handiago baterantz.
- CO2 isuriak murriztea garraio pribatuan.
- Debagoieneko autoaren mugikortasun alternatiborako sarea sortzea, eta Debagoieneko ibilgailu publikoen elektrifikazioa lortzea.
- Neutralitate energetikoa industrian.
- Formaziorako eta kontzientzia hartzeko hezkuntza metodoak.
- Bertako kontsumoa bultzatu eta sustatzea.
- Informazioa hedabideen bitartez.
- Hiri aterpe klimatikoak sortu.
Berri eman dutenez, datozen egunetan, gomendio bakoitzaren deskribapen garatua egingo dute publiko.
Erantzuna, sei hilabeteko epean
Gomendio-sorta adostuta, prozesua sustatu duen Mandatu Organoari helarazi diote, eta horrek konpromisoa hartu du gomendio horiei sei hilabeteko epean erantzun bat emateko.
Mandatu Organoa sektore publiko, pribatu eta komunitarioko 18 eragilek osatzen dute eta prozesua bideratzen ari dira, lankidetzan. Antzuola, Aramaio, Aretxabaleta, Arrasate, Bergara, Elgeta, Eskoriatza, Leintz Gatzaga eta Oñatiko udalek, Deba Garaia landa garapenak, Ekiolak, Berenerrek, Ixotzenek, Esnargik, Tantaik, Goienerrek, Fagorrek eta Enpresarek osatzen dute organo hori.
