Gaur, azaroak 12, ELA, LAB, ESK, Steilas, HIRU eta Etxalde sindikatuek deituta manifestazioa egingo dute Bilbon, Eusko Jaurlaritzan hasi, PSE-EEren egoitzatik pasa eta EAJren egoitza nagusiraino, gutxieneko soldataren Herri Ekimen Legegilea tramitera onartu eta Legebiltzarrean eztabaidatu dadin eskatzeko. "Sindikatuek, pentsiodunen mugimenduak eta gizarte, feminista eta gazte erakunde askok bultzatutako borroka da hau, eta borroka hori partekatu behar dugu irabazi arte".
Bestalde, azaroaren 21ean Gasteizko Salburua Gizarte Etxean, Euskal Herriko Pentsiodunen Mugimenduko Emakumeen V. Asanblada ospatuko dute: "Mugimenduko emakumeok urtero egiten dugun batzarra ekimen garrantzitsua da, eta mugimenduko emakume askok elkar ezagutzeko eta biltzeko balio izan du, guretzat bereziki garrantzitsuak diren gaiak jorratzeko, hala nola, pentsioetan dagoen genero-arrakala, alargun-pentsioa, zaintzak edo Legegintzako Herri Ekimenak emakumeengan duen eragina [...]. Azaroaren 21ean, Gasteizen, ehun emakume pentsiodun baino gehiago bilduko gara. Guztien artean erabakiko dugu zer erantzun sendo eman EAJri eta PSE-EEri, milaka pertsonaren pentsioak igotzeari uko egiten diotelako, zahartzaroan diru-sarrera duinik ez dutelako eta berogailua edo argia ordaintzeko iristen ez zaielako".