Dozenaka bergarar bildu zen atzo arratsaldeko zazpietan Aroztegi aretoan izan zen erakusketaren inaugurazioan. Miguel Angel Elkoroberezibarrek hartu zuen lehendabizi hitza, eta urteurrena dela eta egindako ekintzen berri eman zuen, besteak beste. Azpimarratu zuen Okinak Barrenkalean jaiotakoa zela eta orain, haren lanak, jende askoren etxean daudenak, kale berean daudela ikusgai.
Bergarako kultura zinegotzi Maite Usabiagak nabarmendu zuen Okinaren margolanak "gure herriaren ondare" direla, eta erakusketak ahalbidetzen duela Okina izandako artista omentzea eta pertsona eta haren obra bizirik mantentzea.
Obrak biltzeko lanetan aritu da Xabier Agirre, eta hark adierazi zuen erakusketaren konposizioa prestatzerako orduan, erabili dituztela lehendabizi erretratuak. Zioenez, hor ikusten da Okinaren ibilbidean zehar izan zuen bilakaera, eta ostean, jarri dituztela bodegoiak eta paisaiak.
Erakusketaren ordutegia
Atzo zabaldutako erakusketa urriaren 26ra arte egongo da zabalik honako ordutegian:
- Martitzenetik egubakoitzera: 18:00-20:30.
- Zapatutan: 12:00-14:00 eta 18:00-20:30.
- Domeka eta jaiegunetan: 12:00-14:00.