Urriaren 4ko festan "dinamika original bat" planteatuko dute Bedelkarrekoek: "Parte-hartzaileek minutu batez aire bidez mugitutako txartelak harrapatu beharko dituzte; batzuk saridunak izango dira eta beste batzuk ez. Parte hartzeko gonbidapenak ekitaldiaren aurreko egunetan banatuko dira Bedelkarreko kide diren saltokietan".
Horrez gain, elkartekideen bideoaren proiekzio jarraitua eskainiko da elkartekideei ateratako argazkiekin; Bergarako Musika Eskolako dantzarien emanaldia izango da; ekimena musikaz girotuko da; Bergarako merkataritzari balioa emateko egin del murala margotu eta inauguratuko da; eta taberna bat jarriko da 19.00etatik 21.00etara erosketengatik saltokietan aurrez oparitu diren gonbidapenen truke pintxo-potea eskaintzeko asmoz.
Kanpaina honekin, azaldu dutenez, Bedelkarrek herritarren parte-hartzea sustatu, Bergarako merkataritza dinamizatu eta Irala kalean jai eta topaketa giroko espazioa sortu nahi du.