Hogeita bederatzi postu jarri dituzte aurten, barazki eta frutak saltzeko zazpi postu eta bestelako askotariko produktuak saltzeko 22 postu. Bertako saltzaileez gain, Kantabriatik ere etorri dira. Trikitilariek girotu dute azoka eta askotariko produktuak dastatzeko aukera ere izan da, tartean odolostea.
Lehiaketen atalean, barazkien sariak etxean
Eskubaratz izan da lehenengoa, bigarren postuan Mari Karmen Etxeberria sailkatu da, eta hirugarrenean Ane Gorosabel. Fruituen atalean, berriz, Urtza Sarrionandia izan da garaile, Bizkaiko Igorre herrikoa; bigarren Ezozi Etxeberria soraluzetarra izan da, eta hirugarren Jose Lonbide aretxabaletarra.
Gazta-lehiaketan parte hartu duten hamabi piezetatik, lehen postuen lehia estua izan da. Eneko Goiburu, Segurako Ondarre baserrikoa, garaile izan da 222 punturekin, puntu bakar batez gaindituz Patxi Lopez de Uralde (Larrea, Araba). Hirugarren postuan Ilarduiako (Araba) La Leze gaztandegia geratu da, 208 punturekin; hain zuzen, duela gutxi Ordiziako lehiaketa ere irabazi du.
