Poteo musikatua, parrilako pintxoak, karaokea, puzgarriak, herri bazkaria... Askotariko ekintzekin ari dira ospatzen auzoko jaiak Bergarako San Lorentzon. Aurten, gainera, Ernai kaleko jai batzordeak ere bat egin du San Lorentzokoarekin eta auzoan dioten moduan: "Indarrak bateratuta beti izaten da potenteagoa sortu ahal dena".
Puzgarriak, herri bazkaria, apar-festa, txokolate-jana, eta buruhandiak izan zituzten atzo San Lorentzon. Neska-mutikoak gustura ibiltzeko moduko egitaraua zen eta halaxe izan zen. Apar-festa gerturatutako guztiek biziki eskertu zuten ondorengo txokolate-jana.
Zapata Jaurtiketa Txapelketak aipamen berezia merezi du. Asko izan ziren parte-hartzera animatu zirenak eta nork bere abilezia erakutsi zuen zapata jaurtitzeko modalitatean. Esan behar da asko joan zirela lehia eremutik kanpora, baina zein garrantzi du horrek auzoko jaiak direnean, ezta?
Gaurko ekintzak
Dezente luzatu zen atzo gaua San Lorentzo auzoan. Hala eta guztiz ere ibilaldi neurtua deitu dute auzotarrek gaur goizerako (10:30). Ondoren etorriko dira haurrendako jolas eta tailerrak zein txorizo eta odoloste pintxoak (12:00). Sari-banaketa ekitaldia ere egingo dute. Jaietako azken ekintza izango da.