Giro polita sortu zuten atzo Bergarako Espoloian Al Dual-en rockabilly doinuek. Jendea pilatu zen agertoki aurrean eta denetariko aukerak izan ziren. Egon zen emanaldia eserita jarraitu zuenik, baina egon zen baita ere zutik –batzuek dantzan– jarraitu zuenik ere. Musika dantzagarria egiten du Al Dual –Alfonso Jose Martinez Martinez– Murtziako musikariak. Rock-and-roll klasikoaren maisutzat ezagutzen dute askok eta gustuko du egiten duen hori. Nabaritu egiten da. Taldekideen laguntzarekin giro atsegin eta dantzagarria jarri zuen Espoloian.
Kuriositate modura esan, taldekideen artean zela 1923tik 1930era Bergarako alkate izandako Angel Mugicaren birbiloba, Alfonso Mugica. Berak jakinarazi zuen mikrofonotik: "Nire birraitona herri honetako alkate izan zen. Ez dakit zer egin zuen alkate izan zen urteetan [Barre], baina horrela esan digute beti etxean". Txapela beltza duen baxu-jotzailea da bera.
Al Dual eta bere taldearen emanaldiarekin itxi da Bergarako Udalak eta Gaztelupeko Hotsak-ek elkarlanean antolatu duten 25. Berumuga musika jaialdia.