Tolosaldeako partaide da Nerea Agirrezabal bergararra, eta garaipen historikoa erdietsi du traineruak: Donostian jokatutako IX. Fabrika Banderan garaipena lortu du, eta, hala, lehendabiziko aldiz irabazi du bandera Euskotren Ligan. Era horretan, gaur-gaurkoz, hirugarren da liga horretako sailkapenean, 24 punturekin; aurretik, berriz, Arraun Lagunak (30 puntu) eta Orio (28 puntu) ditu taldeak.
Nerea Perezek, Tolosaldeako patroiak, Ataria-ri adierazi dionez, estropada "oso gogorra" izan zen zapatukoa, Oriorekin aritu baitziren batik bat lehian, "lehendabizi batek olatu bat hartu eta ondoren besteak"; hala ere, "zortea" izan zutela azpimarratu du; azkenean, bi segundoko aldea atera zieten oriotarrei.
Asteburuan, gehiago
Datorren asteburuan hurrengo bi banderak izango dituzte jokoan: zapatuan, II. Gertu Eraikuntzak Bandera izango da jokoan Pasai Donibanen, eta domekan, berriz, Orio Kanpina XIII. Bandera.