Eguzki-plakak instalatzen hasi dira Bergarako San Martin Agirre ikastetxeko teilatuan, Berener-ek jakinarazi duenez. Hain zuzen ere, Alet Taldea ari da zeregin horretan, eta ikasturte hasierarako lanak amaituta egotea da aurreikuspena. Era horretan, Bergarako energia berriztagarrien komunitateak espero du instalazioa gai izatea herriko berrehun etxe edota lokaletarako argindarra sortzeko.
Lanek iraun artean martxan da bazkidetza kanpaina, eta "energia burujabetzaren bidean eta trantsizio sozioekologikoan eragin nahi duten herritarrei" dei egin die "kooperatiban elkartzera, bazkidetzera eta horrelako proiektuak sustatzera, horien erabiltzaile bihurtzeko". Horretarako lehendabiziko urratsa bazkide izatea da: "Kontsumo-puntua (etxea, lokala...) instalazio horretatik bost kilometrotako erradioan baldin badago, eskubidea izango dute hornituak izateko".
Dirulaguntza jasota
Azaldu dutenez, Europa Next Generationeko Energiaren Euskal Erakundeak kudeatutako 83.399,80 euroko dirulaguntza jaso du Berenerrek instalazioa egiteko, eta horri esker 99,88 kilowatteko potentzia duen instalazioa egingo dute.