Emakumeok Mugimenduan programak lehendabiziko aldia izan du aurten, eta hamabost topaketa egin dituzte, bosna saio hiru kirol modalitatetan: trail running, Hankaluze elkartearekin elkarlanean, Maria Sanchezen eskutik; eskalada, Pol-Pol elkartearekin, Maddi Mujika eta Jone Agirrezabalekin; eta txirrindularitza, Lokatza elkartearekin, Nerea Osa gidari. "Topaketa hauek Bergarako eta inguruko emakumeentzako espazio seguru eta lagunkoiak izan dira, kirola egiteko eta esperientziak elkarrekin partekatzeko. Saio bakoitza gidari profesionalek dinamizatu dute, parte-hartzaileen gaitasun eta erritmoetara egokituz".
Udalak emandako datuen arabera, 150 emakumek baino gehiago hartu dute parte programan, "adin eta esperientzia maila ezberdinetakoak, eta elkar ezagutzeko, elkarrekin indartzeko eta komunitatea sortzeko aukera izan dute".