Gogorra izan da selektibitatea?
Bai, oso gogorra izan da. Ikasturte oso batean landutako guztia denbora askoz motzagoan berriro ikastea oso gogorra da; batez ere, dagoen urduritasunaren ondorioz. Urte osoko lana jokoan jartzen da azterketa batean. Ez nuen nota alturik behar, baina horrek ez du kentzen momentuan sentitzen den presioa.
Arte Ederretatik bideratu nahi dituzu zure ikasketak; zergatik?
Betidanik izan dut harreman handia artearekin. Bigarren Hezkuntzan, banekien artearekin lotutako zerbait ikasi nahi nuela. Batxilergoan, ordea, zalantzak izan nituen. Aurreiritziak alde batera utzi nituen eta benetan gustatzen zaidana lehenetsi nuen.
Artearen zer diziplina duzu gustukoen eta zergatik?
Oraindik ez dakit zein diziplina dudan gustukoen, ez ditudalako guztiak landu, baina egia da margotzearekin dudala lotura handiena; izan ere, txikitatik pintura eskoletara joan naiz, eta egunerokotasunetik deskonektatzeko erabili dut.
Musika ere gustuko duzu; instrumenturik jotzen duzu?
Txikia nintzenean biolina jotzen nuen, baina ez zitzaidan askorik gustatzen, eta urte gutxira utzi egin nuen. Orain, gitarra jotzen dut, baina oso gutxi; etxean ikasi ditudan akorde pare bat besterik ez.
Dagoeneko baduzu datorren urteko kontzerturik begiz jota ala ez zara sartu sold out-aren olatuan?
Oraingoz ez, baina talde asko ikusteko gogoa dut. Adibidez, oso gustuko dut Ameriketako Estatu Batuetako The Neighbourhood taldea. Duela gutxi esan dute kontzertuak joko dituztela berriz, eta espero dut 2026an hemendik gertu izatea.
Baduzu ezkutuko beste zaletasunik?
Argazkilaritza eta jostea ere gustuko ditut. Kamera zaharrak asko gustatzen zaizkit. Josteari dagokionez, duela gutxi hasi nintzen ikasten etxean, eta Gabonetan josteko-makina bat oparitu zidaten. Ordutik, hainbat gauza egiten ikasi dut; ilerako gomak edo estutxeak, esaterako. Oihal zaharrak berrerabiltzeko ideia bikaina da.
Ikasketak bukatuta, merezitako oporrak izango dituzu; zer asmo duzu?
Deskantsatzeko denbora izateaz gain, baditut beste hainbat gauza buruan: uztail hasieran hamar eguneko praktikaldia egingo dut, begirale, Allon (Nafarroa). Handik bueltan, maleta prestatu eta Granadara joango naiz lagunekin; gero, Conilera joango naiz, familiarekin; eta amonaren herrian pasako ditut udako oporretako azkenengo egunak.
MOTZEAN
Bidaiatzeko toki bat? Andaluzia.
Furgoneta ala hotela? Furgoneta.
Pentekosteak ala sanmartinak? Pentekosteak.
Janari gustukoena? Entsalada.
Abesti bat? Rusowsky-ren Pink+pink.
Bergarako txoko bat? Kartzela zaharra.