Xabat Irazolak Hirunako Txapelketako balorazio positiboa egin du. "Ia 80 talde izan ditugu txapelketan, beste urte batzuetako kopuruari eutsi diogu eta pozik geratu gara, bereziki saskibaloi giroa izan dugulako Seminarixoan".
Goizean kategoria txikien txanda izan zen, eta arratsaldean nagusiena. "Kuadrilla asko batu ziren arratsaldean partiduak ikusteko eta giro polita egon zen. Pena mixtoen kategorian finala jokatzerako orduan euria hasi zela. Partiduak jokatzeko zoru berezia jartzen dugu, baina euriaz labankor egoten da, eta esango nuke finala jokatu zutenek minik ez hartzeko neurriak hartu zituztela, lasaiago ibili zirela". Hain zuzen, Ointxe!ko senior mailako gizonezkoen eta emakumezkoen taldetako hainbat ordezkari zeuden Ointxemon taldean. "Maila handiko jokalariekin osatu zuten taldea, ondo irabazi zuten".
Gizonezkoen kategorian, berriz, bergarrak eta elgetarrak izan ziren zein baino zein gehiago, eta azkenean etxekoak nagusitu ziren, Masterreka Ronkoliens taldekoak.