Amezketan jokatutako kanporaketan hiru partidutatik bi irabazi zituen Bergarak (1-2) eta atzo ere berdina izan zen emaitza (2-1). Kadete mailako Contreras eta Ilarduiak partidua 22-17 galdu zuten; gazte mailako Etxabek eta Ormaetxeak 22-3 irabazi zuten eta, azkenik, senior mailako Etxaniz eta Oterminek 22-9.
Kadete mailako partidua ondo hasi zuen bikote bergararrak, 7-3 irabazten joateraino, baina bereziki atzelari bergararraren segurtasun faltak eraginda, Amezketako bikoteak buelta eman zion markagailuari (7-12). Bazirudien partidua hor amaituko zela, baina bukaeran lehia gogortu egin zen eta emozioa izan zen azkenera arte (17-22).
Gazte mailako Etxabe eta Ormaetxeak oso maila ona erakutsi zuten eta erraz nagusitu ziren (22-3) eta emaitza horrek ziurtatu zuen Bergarak final laurdenetarako txartela.
Senior mailan, azkenik, Etxanizek eta Oterminek maila ona erakutsi zuten erasoan zein defentsan eta zailtasun handirik barik menperatu zuten Amezketako bikotea: 22-9.
Bergara Kirol Elkarteko Julen Aranburu pozik zegoen jardunaldiaren amaieran: "Pozik gaude bi kanporaketetan gure pilotariek erakutsi duten mailarekin. Ea orain Zestoaren eta Andoainen arteko kanporaketa nola geratzen den, bi herri horietako bat izango da-eta final laurdenetako gure aurkaria".