Martxoaren 20an eta 21ean izandako haizete bortitzek kalte handiak eragin zituzten Agorrosin kirol guneko igerileku estalian. Ondorioz, martxoaren 22an, segurtasuna bermatzeko neurriak hartu ostean, espazio gehienak berriz ireki zituzten arren, estalitako igerileku handia eta txikia itxita mantentzen dira.
Udalak adierazi duenez, estalkiaren egoera aztertuta, ondorioztatu dute behin betiko konponketak denbora luzez luzatuko liratekeela. Horren aurrean, inpermeabilizatzeko-lanak egingo dira behin-behinean, instalazioa lehenbailehen berriz martxan jartzeko helburuarekin. Neurri hori ekonomikoki eta teknikoki bideragarria dela baieztatu dute, eta lanek bi edo hiru asteko iraupena izango dutela aurreikusi dute. Ondoren, igerilekua normaltasunez irekitzea espero da.
Behin betiko konponketa lanak, udazkenean lizitaziora
Bestalde, Bergarako Udalak lan talde bat sortuko du igerilekuaren estalkiaren behin betiko soluzioa lantzeko. Asmoa da udazkenean konponketa lanak lizitaziora ateratzea.
Halaber, ezohiko egoera honek abonatuei ere eragingo die. Normalean abonua bertan behera uzteko azken eguna hilaren 25a izaten bada ere, oraingoan epea luzatzea erabaki du Udalak. Hala, erabiltzaileek aukera izango dute baja eskatzeko apirilaren 6a arte.
