Extremaduran jokatu da aurten Espainiako Duatloi Txapelketa eta larunbatean 75 eta 79 urte bitartekoen lehia izan zen Caceresko kaleetan. Lehen postua eskuratu zuen Juan Martin Elexpuru (1:23:57) bergararrak, bigarren sailkatu zen Roberto Llamedo (1:30:13) galiziarrari sei minutuko aldea aterata.
Duatloiko Sprint modalitateko finala izan zen larunbatekoa, eta lasterketako partaideek 5 kilometro korrikan, ondoren 20 kilometro bizikletan, eta azkenik, beste 2,5 kilometro arineketan egin behar izan zuten. Lasterketan "oso eroso" aritu zen Elexpuru, eta etorkizunean beste lasterketa batzuk egiteko "ondo aurkitzen dela" adierazi du bergararrak. Lasterketatan jarraitzeko gogotsu agertu da, "gorputzak nahikoa dela esaten duen arte", eta forman mantentzeko hiru edo lau entrenamendu saio egiten ditu astean zehar: bi saio korrikan, eta beste bi bizikletan.
Esperientzia handiko korrikalaria
Elexpuruk esperientzia handia du duatloi eta triatloi lasterketetan; izan ere, urte askotan parte hartu du bergararrak bi modalitate horietan. Iaz, adibidez, 70 eta 74 urte arteko kategorian hirugarren postua eskuratu zuen: "38 urterekin hasi nintzen duatloiak eta triatloiak egiten. Azken triatloia 2016ean egin nuen, eta igeri egiteak izan dezakeen arriskuagatik duatloiak egitera pasatu nintzen. Horrela, azken lauzpabost urteetan nabil Espainiako Duatloi Txapelketan parte hartzen".
