Soraluzen 1973an jaiotako baina hamarkadak Bergaran bizitzen daramatzan Iñigo Alberdik hartuko du Bilboko Orkestra Sinfonikoaren zuzendaritza. Azken hogei urteetan Ibon Aranbarri izan da BOS-eko zuzendari nagusia, eta erretiroa hartuko duenez, Alberdi hautatu du Bizkaiko Foru Aldundiak eta Bilboko Udalak osatutako BOSeko Patronatuak, zuzendari kargurako.
Iñigo Alberdiren curriculumean beste pauso bat da BOSeko zuzendaritza. Izan ere, bergararra, Bilboko Koral Elkarteko zuzendari nagusia da 2016tik, eta irakasle laguntzailea Musikenen eta Nafarroako Unibertsitatean. Urteak daramatza lanean musikaren kudeaketan eta Euskadiko Orkestrako zuzendari nagusia izan zen 2006tik 2014ra, eta Lizarrako Antzinako Musikaren Asteko zuzendari artistikoa 2017tik 2019ra. Orkestra Sinfonikoen Espainiako Elkarteko kidea eta lehendakariordea izan da. Eusko Ikaskuntzako batzordekide izan da, baita Musikene, Musika Hamabostaldiko eta ROCEko (Hezkuntza-Kontzertuen Antolatzaileen Sarea) patronatuetako kide ere. Gipuzkoako Arteen eta Kulturaren Kontseiluko kide izan da, eta 2024ko abendura arte Kultura Ministerioko Arte Eszenikoen eta Musikaren Estatuko Kontseiluko kide izan da.
