Senior mailako neskak behar den moduan kantxaratu ziren, BKEko saskibaloi saileko zuzendaritza taldeko Borja Elkoroberezibarren arabera: "Jokalariak, partiduaren garrantziaz jabetuta, mentalitate irabazle batekin irten ziren kantxara, eta erritmoa hasieratik markatu zuten. Defentsan intentsitate handia eta erasoan eraginkortasun handia erakutsita, garaipen argia lortu zuten (80-31), titulua lortzeko lehian euren presentzia ziurtatuz fase erregularra amaitzeko hiru jardunaldiren faltan; ospakizuna taldeak denboraldi osoan zehar egindako lan handiaren isla izan zen".
Kadete mailako neskak sendo lehen postuan
Asteburuko beste norgehiagoka aipagarri bat Azkoitian izan zen, non kadete mailako neskek ligako lehen postua sendotzea bilatzen zuten, kanporaketei kantxako abantailarekin aurre egiteko posizio lortzeko asmoz. Hala ere, partiduaren hasiera ez zen erraza izan Xabat Irazolak zuzentzen dituen jokalarientzat. Lo samar atera ziren eta aurkari oso fisiko batekin egin zuten topo, lehen konpasetan gauzak zail jarri zituena. Nagusitasun teknikoa izan arren, hirugarren laurdenera arte ez zuten markagailua apurtzea lortu, 2-17ko partzial ikaragarri batek Bergararen aldeko balantza behin betiko alde jarri arte. Garaipen horri esker, sailkapeneko goiko postuetan jarraitzen dute, eta aukera handiak dituzte denboraldiaren azken txanpari abantailarekin aurre egiteko.
Gainera, errendimenduko Junior Neskek porrot estua izan zuten asteburuko partiduan. Hala ere, emaitzak ez du ezertan aldatzen egiten ari diren denboraldi bikaina, non talde sendoa eta lehiakorra dela erakutsi duten partidu bakoitzean.
Hurrengo asteburura begira
Hurrengo jardunaldia, senior neskek, zapatuan 20:00etan, Bera-Beraren aurka jokatuko dute Paco Yoldi kiroldegian. Domekan, hilak 30, hitzordu bikoitza izango da Labegaraietako kiroldegian; 16:00etan senior mutilak, Bergara K.E. Diego Valor Barbershop-ek Modelos Modelberriren (Elgoibar) aurka jokatuko du. Bergara bigarren postuan dago eta Elgoibarkoak hirugarren. Partidu estua izango dela aurreikusten dute, eta etxekoak joaneko partidan izandako emaitzaren arantza ateratzeko gogoz daude. Gizonezko seniorretan, bigarren nazional mailan, Bergara-Soraluce, EASO azken sailkatuaren aurka arituko da (18:00). Bergararrek joaneko partidan bi puntuko aldearekin gainditu zituzten.