Eguenean, martxoaren 20an, haize bolada bortitzek Agorrosin igerilekuko estalpean eragindako kalteen ondorioz kirol zentroa eta inguruko espazioak aldi baterako itxi behar izan zituen Udalak, segurtasuna bermatzeko helburuarekin. Atzo, egubakoitza, espezializatutako enpresa batek teilatuan eroritako zatiak kendu zituen, solte zeudenak finkatu, eta estalpeko egitura egonkortu zuen. Hala, egindako lanen ondoren, segurtasuna bermatuta dagoela baieztatu ahal izan du Udalak. Ondorioz, gaur, zapatua, 16:00etan berriro irekiko dituzte Agorrosingo ateak. "Instalazio guztiak egongo dira erabilgarri igerilekua izan ezik. Bestalde, astelehenetik aurrera lehorreko ikastaroak normaltasunez emango dira. Igerilekuari dagokionez, itxita jarraituko du bere sabaiaren egoera teknikoak behar bezala aztertu arte", adierazi dute Udaletik.
Kiroldegia ixtearekin batera Udalak kirol zentro inguruko espazioak ere itxi egin zituen, badaezpada. Jakin, kiroldegi ondoko aparkalekua erabilgarri dagoela, eta Agorrosingo futbol zelaian ere arratsaldeko partiduak normaltasunez dabiltzala jokatzen.
