Joan den astean aurreratu zuen GOIENAk astelehenera bitartean Gipuzkoako Futbol Federazioko hauteskunde prozesura hautagai gehiago aurkeztu ezean Garai Berriak taldeak zuzenean jarraituko zuela, eta halaxe izan da, atzo berretsi zuen hauteskunde-batzordeak Manu Diazek (Bergara, 1965) jarraituko duela futbol gipuzkoarra gidatzen.
Diazen lan-taldea 2020an iritsi zen federaziora, hiru hamarkadez Gipuzkoako federazioa zuzentzen ibilitako Juan Luis Larrea ordezkatzera. Orduan Debagoieneko beste hautagai batek, Adrian Merino aretxabaletarrak, gidatzen zuen Denon Joko Zelaia taldeari hauteskundetan irabazita lortu zuen Garai Berriak taldeak nagusitzea. Eta oraingo hauteskundetan, esan moduan, ez da hautagaitza berririk aurkeztu. Hauteskunde hauek Kirol Lege berriagatik atzeratu dituzte, horrenbestez, hurrengo agintaldia hiru urtekoa izango da, 2028ra arte. Garai Berriak taldeko ordezkariak aurreratu du lehenengo lau urtekoan abian jarritako proiektuei jarraipena eman asmoz erabaki dutela jarraitzea.
