Bergarako Koldo Eleizalde lehiaketen 40. edizioan parte hartzeko deialdia zabalik dago, apirilaren 30era arte. Bergarako Udaleko Euskara Zerbitzuak jarri du abian lehiaketa beste urte batez eta Bergaran jaiotakoek edo Bergaran bizi zein bertan ikasi edo lan egiten dutenek har dezakete parte, bakarka zein taldeka. Bost genero-multzotako lanak aurkez litezke: antzerkia; bertsoa; ipuin idatzia eta poesia; ipuin-kontaketa, podcasta eta txistea; eta komikiak.
Aurkeztutako lanek originalak izan behar dute. Sari-emate ekitaldia ekainaren 14an egingo dute, zapatua, eguerdiko hamabietan, Seminarixoan. Lehiaketari buruzko xehetasun guztiak Bergarako Euskara Zerbitzuaren webgunean daude.
