Irailetik hona bigarrenez egin dute zuhaitz landaketa San Martzial ermitaren inguruetan, bertan dagoen basotxoa pixkanaka haz dadin. Duela 25 urte inguru landatu zituzten haritzak hango lursail batean eta jarraipena eman gura diote inguruko herri-lurretan haritzak, urkiak, lizarrak, elorri zuri eta beltzak eta haginak landatuta. Horrelaxe azaldu du Joseba Susaetak, Kukubasoko kideak: "Txara osteko basotxoak hutsuneak ditu, landa zelaiak daude, eta interesgarria iruditu zitzaigun bai guri eta bai Udalari etorkizunerako baso konektibitate bat sortzea. Animatu den jendearekin landaketa burututa, baso gaztean sortutako bidetxo bat hartuta San Martzialeko kantinara joan gara bukaeran".
Agirretxebarriko mintegitik ekarri dituzte zuhaitzak, eta hazkundea errazteko babesgarriak jarri dizkiete. Tutuen azpikaldeei mozketak egin dizkiete, txoriak hazi bila sartzen direnean, bertatik ihes egin dezaten. Inguruko zuhaitzetan kabi batzuk jartzeko tartea ere hartu dute, helburu nagusia biodibertsitateari mesede egitea izanik.
