"Sari hauekin kirol arloan egindako lana, konpromisoa eta lortutako emaitzak eskertu nahi dira", adierazi du Bergarako Udalak. Edozein bergararrek edo entitatek proposa ditzakete hautagaiak, betiere, norbere burua proposatu gabe.
Epaimahaia Bergarako Udaleko ordezkariek eta Kirol Zerbitzuko arduradunek osatuko dute eta hurrengo irizpideak hartuko dituztela aurreratu du Udalak: kirol-merituak, denbora-dedikazioa, generoa, inklusibitatea, kirol modalitatearen izaera minoritarioa, hautagaiaren adina eta hainbat kirol modalitatetan parte hartzea. Gehienez ere urte osoko bost abonu banatuko dituzte.
Proposamenak bidaltzeko baldintzak
Proposamenekin batera hautagaiaren izen-abizenak, balorazio-irizpideei buruzko azalpenak –merituak, dedikazioa, modalitatea eta abar– argazkia, eta, "hala badagokio komunikabideetan argitaratutako informazioa" aurkeztu beharko dira urtarrilaren 10a baino lehen Bergararren Arretarako Zerbitzuan (BAZ), Agorrosinen edo udalaren webgunean. Hautagaien zerrenda otsailean argitaratuko dute Udalaren webgunean.
Hautagaien proposamenak bidaltzen dituztenen artean hiru hilabeteko abonu bat zozkatuko da.
