Bergarako enpresetan euskararen erabilera areagotzean jarraitzea du helburu Harixa egitasmoak, gaur, hilak 28, eginiko batzarrean hala erabakita. Horretarako, egitasmoan parte hartzen duten 38 entitateen arteko harremanen inguruko diagnostiko bat egin dute; hala ere, batik bat, Bergarako Udalarekin eta Miguel Altuna zentroari zuzentzen dizkieten idatzietan darabilten hizkuntzaz jardun dute. Are gehiago, enpresa barneetako harremanei dagokienez, Eusle metodologia abiatu dute konpainia batzuek, "euskaraz hitz egiteko gaitasuna duten pertsonen ohituretan eragiteko", Udalaren hitzetan.
Horrez gain, azaldu dutenez, iazko batzarreko ondorioetako bat izan zen lanean euskara gehiago erabili zedin "beharrezkoa" dela hornitzaileak diren zerbitzu enpresak ere egitasmora batzea; bada, jakinarazi dutenez, datozen asteetan bat egingo dute konpainia batzuek.
Lau lan-ildo zehaztuta
Datorren urteari dagokionez, lau lan-ildo zehaztu dituzte enpresek: euskararen aktibaziorako sarea osatzea; langile berriei enpresara harrera euskaraz egitea; adimen artifiziala eta hizkuntza teknologiak garatzea; eta enpresaren irudia eta euskara lantzea.
