2024ko Rikardo Arregi sariak banatzeko ekitaldia egin zuten atzo, eta Ikusgela proiektuarendako izan da Komunikazioa sailekoa. Euskal Wikilarien Elkartearen proiektu bat da, hain justu, Ikusgela, eta kide den Ander Bolibar bergararrak jaso du saria. Haren hitzetan, 150 bideo dituzte, zortzi bildumatan banatuta, eta laurogei pertsona aritu dira lan horretan; horrenbestez, azpimarratu du "lantalde handia" dagoela eguneroko lanaren atzean. Are gehiago, euskarazko eduki libreen garrantzian ere arreta jarri du: "Oraindik badaukagu gauzak egiteko gogoa: norbait animatzen bada elkarrekin egitera, gu pozik egongo gara".
Epaimahaiak ere sariaren zergatiaren berri eman du, azpimarratuz "hainbat gairen inguruko euskarazko bideo labur, erakargarri eta dibulgatiboak" ekoitzi eta jendearen esku jartzeaz gain, Ikusgela proiektuak gazteei "gertuko" zaizkien "egungo eduki digitalen ohiko lengoaian" sortzen dituela ikus-entzunezkoak: "Gaiek eskatzen duten sakontasunari uko egin gabe, eta, gainera, lizentzia libreekin argitaratzen dira, euskarazko jakintza librearen sustapen eta eguneratzeari balio handiko ekarpena eginez".
Kazetaritza Saria, 'Feminizketak' lanak
Feminizketak proiektuak eskuratu du Kazetaritza saileko saria: Berria egunkarian argitaratutako elkarrizketa sorta bat da, Maite Asensio, Amaia Igartua, Isabel Jaurena eta Olatz Silva kazetariek egina.
Horrez gainera, finalisten artean zeuden beste sei proiektu, eta tartean zen Ane Zuazubiskar arrasatearra partaide den Ez hain ondo bideopodcasta, Komunikazioa sailean.
