Galiziako Jay Industrial Cubertera enpresa erosi du Bergarako Lacor Ibili taldeak, eta, era horretan, helburu dute 100 milioi euroko negozioa erdiestea, berrehun langileko plantillarekin. Horretarako, adierazi dutenez, "errendimendu betean" jarraituko dute Galiziako enpresako instalazioek, eta, horrenbestez, 10.000 metro karratu handituko dira Lacor-Ibiliren instalazioak. "Gure helburua sektorean hazten jarraitzea da, gure bezeroei kalitate handiko produktuen eskaintza gero eta zabalago batekin zerbitzurik onena eskainiz", adierazi du Izaskun Larrañagak, Lacor-Ibiliko kontseilari delegatuak.
Lacor-Ibili taldeak, gaur-gaurkoz, 80 herrialde baino gehiagotan komertzializatzen ditu bere produktuak, eta Bergaran du egoitza nagusia, ehun langileko plantillarekin; horrez gain, biltegi logistiko bat du Alegria-Dulantzin (Araba), eta 65 beharginek dihardute han lanean.
