Ikasturtearen hasieratik daramate Bergarako udaleko langileek beraien lan baldintzak hobetu eta marko negoziatzailean bermeak izatea aldarrikatzen. 2012. urtetik berritu gabe zeukaten hitzarmena, eta udalarekin adostasun batera heltzen ez zirela ikusta, hainbat mobilizazio egin zituzten, eta, azkenean, Udal Gobernuarekin bilera ugari izan dituzte urrian zehar.
Azkenean, hasi da gatazka bideratzen azken asteetan. Gaur izan dute azken langile batzarra, eta adierazi dute lan gatazka birbideratzeko elkarrizketak "bide onetik" doazela. Bi aldeek konpromisoak hartu dituztela azaldu dute, eta langileek aldarrikatu dituzten bost eskaerak zertan dauden azaldu dute:
1. Marko negoziatzailearen bermerako neurriak hartu dira.
2. Lan postuen balorazio orokorraren korapiloak "askatu" dira eta aurrera begirako urratsak zehaztu eta adostu dira.
3. Belaunaldi erreleboa eta ezagutza transferitzeko planaren azterketa egiten ari da. Plana gauzatzeko "konpromiso argia" dagoela adierazi dute langileek.
4. Lan Hitzarmena negoziatzeko egutegia adosteko konpromisoa hartu dute. Zaintza eta kontziliazioa errazteko baimen eta lizentzia berriak “Bergarahitz”en txertatuko dituztela ere adostu da.
5. Kontratazio politika eta enplegu planak azterketa sakonagoa egitea eskatzen du. Azken puntu horretan, "denbora hartu eta elkarrizketa prozesu pausatuagoa" behar dutela adostu dute.
Hori horrela, langile batzarrak "Elkarrizketa eta negoziazioaren bidean jarraitzearen erabakia" babestu du.
