Organo Erromantikoaren Nazioarteko Zikloaren 25. urteurrena ospatzen ari dira urrian, eta Bergara da emanaldiak jasotzen ari den herrietako bat. Urriaren 13an beste kontzertu bat izango da herrian, Santa Marina parrokian (19:00), eta Ignacio Arakistain organista eta Aritz Segura zeharkako flauta jotzailea izango dira protagonista nagusiak.
Musikari gipuzkoarrak
Arakistain azpeitiarra da, eta musika munduan lehen pausoak herriko Juan de Antxieta musika eskolan eman zituen. Ondoren, haren ibilbidea Donostiako Francisco Escudero erdi mailako kontserbatorioan jarraitu zuen. Segura, berriz, errenteriarra da, eta bertan eman zituen lehen pausoak musikaren munduan. Hark ere Donostiako Francisco Escudero musika kontserbatorioan egin zituen ikasketak; gradu profesionalekoak, hain zuzen. Eta gaur egun, haren ibilbide artistikoan lanean diharduen bitartean, Bergarako eta Lesakako musika eskoletan ere egiten du lan.
