Urritik aurrera xake ikastaroak emango ditu Bergara Xake Eskolak, gazteei xakea gerturatu ahal izateko eta modu horretan jokalari belaunaldi berri bat sortzeko. Ikasteko zein hobetzen joateko gogoz dauden gazteena heldu nahi dute eskolekin. Bi talde ezberdin aterako dituzte: lehenak astearte arratsaldeetan elkartuko dira eta bigarrenak, ostiral arratsaldeetan.
Eskola guztiak Zabalotegi Dorrearen etxepean dagoen Bergara Xake Klubaren lokalean izango dira. Monitore titulatuek emango dituzte eskolok, eta hiruhileko prezioa 15 eurokoa da. Bergara Xake Klubeko kide Yon Suinagak adierazi duenez, ez da izena emateko epemugarik egongo, baina interesatuei ahalik eta azkarren apuntatzea gomendatzen die, gai garrantzitsuak jorratu ostean ez sartzeko.
Xakea eta gazteak
Garrantzitsua da xakea gazteei gerturatzea, Suinagaren ustez: "Xakean egiteak hainbat gaitasun lantzeko aukera ematen du; adi- bidez, kalitate kognitiboak, memoria, bisio espaziala eta abar". Modu horretan, xakeak onura ugari ekar diezazkieke praktikatzen duten gazteei.
Bergaran osasuntsu
Bergaran xakea osasuntsu dago: "Urteak dira lanean gabiltzala, eta xake eskolara etortzen den talde polita osatu dugu. Uztailean egiten dugun txapelketara, adibidez, 32 ume etorri ziren joan den urtean". Osasun hori helduen taldera ere estrapolatu daiteke: "Helduak ere asko gara. Klubean 40 pertsona inguru elkartzen gara, eta geroz eta jende gehiago animatzen da. Ligan ere jokatzen dugu eta lau talde osatu ditugu".
