Iker Badiola Etxaburu da EHU Euskal Herriko Unibertsitateko Kultura Zientifikoko Katedraren zuzendari berria, Eva Ferreira errektoreak hala izendatu ondoren. "Helburu nagusia da Katedrak zientzia-dibulgazioan duen erreferentzialtasunari eustea. Gizartean ezagutza hedatzen jarraituko dugu gizarte eragile desberdinekin lankidetzak sortuz eta saretuz", adierazi du Badiolak.
Bergaran bizi den ondarroarra 2001ean lizentziatu zen Biologia Zientzietan, eta 2007an eskuratu zuen doktore titulua; tarte horretan, besteak beste, ikertzaile gazte onenaren saria jaso zuen 2006an. Egun, Medikuntza eta Erizaintza Fakultatean da irakasle eta Biologia Zelularra eta Histologia Saileko zuzendari akademikoa ere bada. Horrez gain, 28 artikulu zientifiko argitaratu ditu, histologiari buruzko lau liburu idatzi eta hiru doktore tesi zuzendu ditu; are gehiago, nazioartean ere egonaldiak egin ditu, eta egun gibeleko metastasiaren aurkako terapia berriak lortzeko lanean dabil EHUko Signaling Lab taldean.
