Guggenheim Urdaibai Stop plataformakoek azpimarratu zuten, besteak beste, proiektuak kostaldeari buruzko legea urratzen duela: "Alde batera uzten da itsas-lehorreko jabari publikoaren defentsa eta babesa".
Era berean, salatu zuten Urdaibai moduko eremu babestu baten hainbat kalte eragingo zituela: "Nazioarteko babesa duten eta padurari irabazitako lurrei buruz ari gara. Administrazioek baimena ematen diete Muruetako ontziolei lurzoruak deskontaminatzeko erantzukizuna saihesteko. Indarrean dauden babes-figura guztiek eremuaren kontserbazio-egoera altua mantentzeko betebeharra dakarte. Museoaren instalazioak Urdaibaiko paduretatik 20 metrora eraikiko lirateke. Balio ekologiko handia duenez, eremu babestua da, eta, gainera, turistifikazioaren eragina jasango luke. Biosfera erreserba batean turismo masiboak ondorio negatibo ugari izan ditzake, bai ingurune naturalean, bai tokiko komunitateetan. Biosfera-erreserbek euren balio ekologiko eta kulturalagatik aitortutako eremu babestuak dira, eta biodibertsitatearen kontserbazioa, garapen iraunkorra eta ikerketa zientifikoa sustatzera bideratuta daude".
