Ekinez jaialdiak hirugarren edizioa izango du datorren urtean. Hala iragarri dute antolatzaileek, ohar bidez, "ilusio eta zirrara batekin". Modu horretan, maiatzaren 30ean eta 31n egingo dute hirugarrena, Labegaraietan.
Lehen edizioak "arrasto berezia" utzi ziela diote antolatzaileek. "Zein ederra izan zen Agorrosin goraino beteta ikustea zuzeneko kaleko doinuen bueltan dantzan. Ahaztezina izan zen!". 2023koa Labegaraietan egin zuten. "Askotariko estiloak izan ziren protagonista, eta kaleko musikaren topagune izatea oinarria eta helburua".
Aurten ez dute egin, baina nabarmendu dute ez direla geldi egon. "Talde berriak eta kontzertuak babesten jarraitu dugu, hori delako benetan mugiarazten gaituena. Eta, nola ez, Ekinez jaialdiaren hirugarren edizioa izango dena ere prestatzen aritu gara. Baditugu lekua, data eta ilusioa, eta laster joango gara jaialdiaren gaineko berri gehiago ematen", gaineratu dute.
