Zergatik etorri zara Bergarara ziklismoan lehiatzera?
Espainian lasterketak egiteko eta esperientzia hartzeko aukera gehiago daude Ameriketako Estatu Batuekin alderatuta. Txirrindulari gisa ahalik eta gehien ikasi eta haztera nator.
Nolako esperientzia ari da izaten?
Asko ari naiz gozatzen, atsegin dut-eta munduan zehar bidaiatzea, jende berria ezagutzea eta kultura berriez ikastea. Nolakoa izan da taldearen harrera? Itzela izan da, taldekide gisa hartu naute. Erraz egokitu naiz, ohituta nago asko bidaiatzen eta jende berria ezagutzen. Beraz, niretzat ez da arazoa hemen bakarrik egotea.
Zer azpimarratuko zenuke Igamo Packaging taldearen izaeratik?
Gehien gustatzen zaidana da taldeko kideak oso gertukoak direla, familia baten antzeko harremana dagoela taldekideen artean. Hasieratik sentitu naiz beste taldekide bat bezala, eta hori eskertzekoa da.
Ze helburu dituzu begiz jota epe motz edo ertainera?
Nire hurrengo helburua irailean jokatuko diren Munduko Txapelketak dira. Bergarako taldera etorri naiz iraileko Munduko Txapelketak prestatzeko. Aurrera begira, ahalik eta lasterketa gehienetan parte hartu nahiko nuke, eta, ahal denetan, azkarrena izan helmugan. Eta egunen batean, posible balitz, txirrindulari profesionala izatea litzateke nire ametsa.
Abuztura arte lehiatuko da Bergaran
Lokatza Ziklismo Eskolako Igamo Packaging talde barruan dagoen giro onaren lekuko izaten ari da Helena Jones estatubatuarra Bergaran bizitzen ari den esperientziari esker. Abuztura arte arituko da Bergarako taldearekin lehiatzen eta adierazi du "prestaketa onena" izango dela irailean jokatuko diren Munduko Txapelketei begira.
