Espainiako atletismo txapelketako azken probetako bat izan da 4x100eko errelebotako lasterketa. Bart jokatu dute, 22:30ean, txapelketa amaitzear zegoenean, eta orduan etorri da txapelketako urrezko bigarren domina Debagoienera. Bezperan Malen Ruiz de Azuak egina zuen balentria pertika saltoan (4,35), baina Eneko Carrascalek ez zuen salto hirukoitzean ametsetako saioa egin –bosgarren izan zen, 15.78ko saltoaz– eta Calbanok bera ere oso gertu izan zuen 200 metrotako lasterketan podiumera igotzea –laugarren izan zen–.
Esan moduan, baina, 4x100 errelebotako lasterketan, Real Sociedadeko laukoteak –Javier Mariscal, Andoni Calbano, Joseba Larrauri eta Daniel San Juan– sekulako lana egin zuen. Playas de Castellon eta CA Fent Cami Mislatako atletekin izan zuten lehia estuena, baina txuri-urdinek atzetik aurrerako lasterketa eginda 39.62an geratu zuten erlojua, urrea irabaziz.
