Herriarteko pilota txapelketaren itzulerako partiduak jokatuko dira gaur, Ataunen, eta guztia erabakitzeke dago Bergararen eta Ataunen arteko kanporaketan. Bergarako kadeteek 22-4 irabazi zuten joaneko partiduan, gazte mailako bikoteak 6-22 galdu zuen eta seniorrek ere ez zuten lortu ataundarrak garaitzea, 21-22 galduta. Hala ere, emaitzak ikusita, mahoneroek badute finalerdietara igarotzeko itxaropena. Horretarako, gutxienez, bi partidu irabazi beharko dituzte, eta, hori ez ezik, egindako tanto kopuruaren aldeak ere ataundarrek lortutakoa baino handiagoa izan beharko du.
Pilotarien aldaketa
Bigarren kanporaketarako aldaketak egingo ditu Bergarak. Alde batetik, Ilarduiak jokatuko du Ormaetxearen ordez gazte mailako partidua, azken horrek min hartu baitzuen joaneko neurketan; bestetik, seniorretan, Etxanizek hartuko du –joaneko partidua ezin izan zuen jokatu– Martinen lekua.
