Ekainaren 1ean, 2an eta 3an Otaba jaiak ospatuko dituzte Elosuan. Aurtengo nobedadeetako bat da herri kirolen ordez artzain txakur erakustaldia egongo dela. Domekan izango da, ekainak 2, plaza azpiko zelaian (16:30). Lau artzain gonbidatu dituzte: Miguel Arregi oñatiarra Lagun txakurrarekin; Joxe Mari Bengoa oñatiarra Zeu txakurrarekin; Jabier Zubiaurre mutrikuarra Mendi-rekin; eta, azkenik, Kepa Ardanza abadiñarra Txuri-rekin.
Bihar, ekainak 1, mus txapelketa izango dute 16:30ean, eta 16:00ak arte izena eman daiteke; 21:00etan, txiste kontatzailea eta bertso afaria izango dute Maialen Lujanbio eta Andoni Egañarekin –gai-jartzaile lanetan Ibon Leibar Txinbo arituko da–. Domekan izango da erretiratuendako bazkaria, Elurmendi elkartean (14:30). Astelehenean, ekainak 3, Otaba Txiki eguna ospatuko dute; auzo bazkaria (15:00) eta erromeria izango dituzte, besteak beste.