ELAk salatu duenez, prebentziorako "neurri eraginkorrak falta" dira: "Ez dira segurtasunean behar adinako inbertsioak egiten, eta enpresa askok ez dute oinarrizko legea bera ere betetzen". Are gehiago, erantsi du erakundeek "ez dutela errealitate hori aldatzeko konpromisorik, ezta borondate politikorik ere". Hori dela eta, segurtasun eta osasun eremuko araudia bete dadin, ikuskari gehiago eskatu ditu: "Egun daudenak ez baitira aski".
Era berean, sindikatuak doluminak eman dizkie maiatzaren 22an istripua izan eta astelehenean hil zen herritarraren familiari eta lankideei. Horrez gain, langileen lan osasuna bermatzeko konpromisoa ere erakutsi du, "enpresaz enpresa, negozio kolektiboaren eta mobilizazioaren bidez".
Arratsaldean ere mobilizazioa
Herri eragileek deituta, gaur arratsaldean beste mobilizazio bat egingo dute Lan istripu gehiagorik ez! lelopean, San Martin Agirre plazan; 19:00etan izango da.
