Koldo Eleizalde lehiaketa jarri du martxan Bergarako Udaleko Euskara Zerbitzuak, eta lau generotako lanak aurkezteko aukera izango dute parte-hartzaileek; ipuin idatzia eta poesia; bertsoa; komikiak; eta, kontakizuna eta interpretazioa (antzerkia, podcasta, ipuin kontaketa, txisteak edo umorezko pasadizoak). Bergararrek edo Bergaran bizi, ikasi edo lan egiten dutenek har dezakete parte, bakarka zein taldeka.
Lanak aurkezteko epeari dagokionez, apirilaren 12a da azken eguna, eta bi eratara aurkeztu daitezke: grabazioak –entzunezkoak edo ikus-entzunezkoak– eta idatziriko lanak, Bergarako Udaletxeko webgunean edo paperean entregatuta.
Bergarako Udaleko Euskara batzordeak hautatuko du epaimahaia, eta saritutako lan guztiekin liburu bat argitaratuko da, ikastetxeetan banatzeko.
