Iazko Bilboko Loraldia jaialdian estreinatu zuten hitzak eta musika osagai nagusi dituen Popperra, afterra eta utopia izeneko ikuskizuna; Danele Sarriugarteren idatzi batetik abiatuta sortutakoa da. Eskarmentu handia duten bi sortzaile izango dira Bergarako gaztetxeko taularen gainean: Danele Sarriugarte Elgoibarko idazlea eta alboan izango duen Miren Narbaiza Mice musikari eibartarra.
Askotariko gaiei erreferentzia egingo diete ikuskizunean zehar: doluari, dantzari, irudimenari eta etorkizunari, besteak beste. Idazlearen kontakizunak, baina, Miceren zuzeneko musika izango du lagun; estilo eta garai askotariko doinuak eskainiko ditu Sarriugarteren hitzak apaintzeko; boleroa, reggaetona eta elektronika, esaterako.
Otsailaren 8an izango da estreinakoz Debagoienean ikusteko aukera: Bergarako kartzela zaharrean, 20:00etan hasita.
