Gorka Artola alkateak eta Zihortza Marzan zinegotziak egin zieten ondo-etorria, eta alkateak adierazi zien udaletxeko ateak zabalik dituztela gainerako bergararrek legez: "Euskal Herrian, baita Bergaran ere, gure historian zehar ezagutu dugu migratzeko beharra arrazoi politiko, ekonomiko edo bestelakoengatik. Gaur egun, gure egoera desberdina dela esan dezakegu, horregatik, Udaletik uste dugu une honetan harrera herria izan behar dugula gure herrira bizitzera iritsi zareten guztiontzat".
Marzan zinegotziak, ostera, euskarak Bergaran duen garrantzia nabarmendu nahi izan zien, eta herrira iritsitakoei euskarara hurbiltzeko gonbidapena egin: "Udaletik euskaldunon altxorra den euskara ezagutzera eta zuena sentitzera gonbidatzen zaituztegu. Badakigu ikasteko zaila den hizkuntza dela, eta askotan bizitzan beste lehentasun batzuk dituzuela. Baina ziur gaude, ikasiz gero, mundua eta Bergara beste begi batzuekin ikustea lortuko duzuela".
Ekitaldia borobildu zuten musikak eta dantzek lagun eginda.
