Gazte mailako Goizper BKE eskubaloi taldeko neskek Euskadiko igoera fasea jokatuko dute asteburuan Eibarko Ipurua kiroldegian. Lau talderen arteko hiruko ligaxka jokatuko dute eta horrek esan nahi du Bergarako taldeak hiru partidu jokatu beharko dituela hiru egunetan; domekan lehen postuan amaitzen duen taldeak soilik lortuko du igoeraren sari preziatua.
Defentsa gogorra eta eraso azkarra berreskuratzera
Denboraldi bikainaren ostean, azken bi partiduak galdu ostean heldu dira bergararrak igoera fasera. "Denboraldi osoan galdutako partidu bakarrak izan dira, baina denboraldi osoan erakutsitako defentsa gogorra eta eraso azkarra islatzen bada Eibarko kantxan, edozein talde menderatu dezakegu", adierazi dute.
Hiru partidu
Hiru partidu hauek jokatuko dituzte bergararrek igoera fasean: gaur, 16:45ean, MEK Eibar eskubaloia taldea izango dute aurrez aurre; bihar, 11:45ean, Cimde Elgoibar taldearen aurka jokatuko dute; eta etzi, 10:00etan, Zuazo Gorria taldearen aurka neurtuko dituzte indarrak.
