Ndank Ndank elkartearen ikasturte honetako elkarbizitza eta elkartasun programaren barruan etorri da Gerehou aktibista antiarrazista Bergarara. Irizar jauregiko Euskalduna aretoa herritarrez bete zen atzoko hitzaldia bertatik bertara jarraitzeko; Gerehou-k hainbat adibide arrazista jarri zituen, komunikabideetako iragarkietatik hasi eta egunerokoan ematen diren egoeretaraino. Dioenez, arrazismoan heziak gara.
Ndank Ndank elkartearen elkarbizitza eta elkartasun programaren barruan hurrengo zita izango da abenduaren 14an. Jon Maiak eta Mamadou Sarr-ek Atzoko eta gaurko migrazioak izeneko saioa eskainiko dute Seminarixoan. Era berean, Bergarako hiru ikastetxeetako lehen hezkuntzako ikasleekin hainbat lanketa egingo dituzte. Horrez gain, Senegal bertatik bertara ezagutzeko aukera ere eskainiko dute aurten. Apirilerako Senegaleko leku desberdinak ezagutzeko bidai bat antolatu dute, eta abuzturako Dionewarrerako egonaldia. Bidaia horretan interesatuta daudenak Ndank Ndank elkartearekin jarri beharko dira harremanetan.
